‘द हिंदू’ या निष्पक्ष दैनिकाने ज्यांचा उल्लेख ‘गझलसम्राट सुरेश भट यांची मशाल घेऊन पथदर्शक बनलेले गझलकार,’ असा केला, झी चोवीस तास या वाहिनीचे व झी मंराठी दिशा या आठवडापत्राचे मुख्य संपादक विजयजी कुवळेकर ज्यांना ‘भट यांचे अंतरंग शिष्य’ म्हणाले, ते गझलकार प्रदीप निफाडकर यांनी प्रेम व दारूत अडकलेल्या गझलेत वात्सल्यता, कौटुंबिकता व आध्यात्मिकता आणली.
पत्रकार म्हणूनही ते सुपरिचित आहेत.
प्रदीप निफाडकर हे महाराष्ट्र साहित्य परिषदेचे कोषाध्यक्ष आहेत.
पुस्तके:-
‘स्वप्नमेणा’ (गझलसंग्रह, तिसरी आवृत्ती समाप्त) ‘गझलदीप’ (गझलेची माहिती देणारा ग्रंथ,पहिली आवृत्ती समाप्त), ‘वेगळे वाटसरू’ (व्यक्तिचित्रण), ‘तीर्थंकरांची गाणी’ (24 तीर्थंकरावर गाणी, गायक सुरेश वाडकर) ‘मै शायर’ ( उर्दूतील ३५ शायरांवरील बहुचर्चित लेखांचे पुस्तक), ‘गझलसम्राट सुरेश भट आणि…’( गुरूवर्य सुरेश भट यांचे चरित्र),एकमेव (गझल वगळून कवितांचा संग्रह), गझलधाम (गझलसंग्रह) अर्थारती ( रोज म्हटल्या जाणार्या आरत्यांच्या शब्दाशब्दांचा अर्थ सांगणारे पुस्तक) बस्तिक (उर्दूतील ५५ अजरामर शायरांचा इतिहास) नुकतीच त्यांची तीन पुस्तके – ओशो यांची प्रवचनांचा अनुवाद असलेली- णमोकार, अंतर्तप, सूत्र अशी तीन पुस्तके मेहता प्रकाशनातर्फे प्रकाशित झाली आहेत.
संपादन:-
‘रसवंतीचा मुजरा’ (गुरुवर्य सुरेश भट यांच्या अप्रकाशित कवितांचे संपादन),‘माँ’ (भारतातील सर्व भाषा तसेच नेपाळी, इंग्रजी भाषेतील ‘आई’ या विषयावरील कविता),‘आवडलेल्या गझला’ (महाराष्ट्रातील 85 मराठी गझलकारांच्या गझलांची निवड)
विशेष:-
आकाशवाणीचे मान्यताप्राप्त कवी, ‘मराठी गझल : प्रदीप निफाडकर’ (निफाडकर यांच्या गझलांचे व मुलाखतीचे पुस्तक ), उर्दू साहित्य परिषदेचे ते बिनविरोध निवडून आलेले पहिलेच मराठी भाषक अध्यक्ष, मुक्ताईनगर येथील अखिल भारतीय उर्दू मुशायर्यात अध्यक्ष .
ध्वनिफीत:-
‘देखणी’ एच. एम.व्ही. कंपनीतर्फे प्रकाशित. याशिवाय राम कदम,गजानन वाटवे,भीमराव पांचाळे व हर्षित अभिराज यांच्यासह अनेकांतर्फे श्री.निफाडकर यांच्या गझलांचे गायन.
इतर:-
इयत्ता दहावीच्या पाठ्यपुस्तकात तसेच मराठवाडा विद्यापीठाच्या बी.ए.च्या अभ्यासक्रमात गझलेचा समावेश. मुक्त विद्यापीठात वृत्तविद्या अभ्यासक्रमाच्या पाठ्यपुस्तकात लेखन.
चित्रपट गीत,मालिका:-
मोहिनी’ व ‘स..सासूचा’ हे चित्रपट तर ‘मी मराठी’ या वाहिनीच्या ‘सलाम नाशिक, सलाम नागपूर व सलाम कोल्हापूर’ या कार्यक्रमांचे शीर्षक गीतलेखन
पुरस्कार:-
राज्य उर्दू अकादमीचा विशेष पुरस्कार, कै. भाऊसाहेब पाटणकर स्मृती, उर्दूमित्र, वैष्णवमित्र,भारतरत्न डॅा. बाबासाहेब आंबेडकर समाजनिष्ठ पत्रकारिता, साहित्यदीपचा गझलदीप पुरस्कार, नाशिकच्या रामसुखजी भट्टड पुरस्कृत कै. दादासाहेब पोतनीस आणि दै. देशदूततर्फे ‘गुणवंत’, साहिर लुधियानवी व बलराज सहानी फाउंड़ेशनचा ‘जाँ निसार अख्तर पुरस्कार’ असे मानाचे अनेक पुरस्कार. ‘स्वप्नमेणा’ या गझलसंग्रहास नाशिकच्या सार्वजनिक वाचनालयातर्फे सर्वोत्कृष्ट काव्यसंग्रह म्हणून ‘प्रभाकर वैद्य पुरस्कार’ तर ‘गझलदीप’ पुस्तकाला यशवंतराव चव्हाण प्रतिष्ठानचा पुरस्कार’
पत्रकारिता:-
‘ सकाळ ’; ‘लोकमत ’;’ देशदूत ’ अशा वृत्तपत्रांमध्ये तब्बल २६ वर्षे उपसंपादकापासून कार्यकारी संपादकापर्यंत विविध पदांवर कार्य. अनेक गाजलेल्या मालिकांचे धाडसी लेखन. फक्त कवितेला वाहिलेल्यात ‘काव्यदीप’ या मासिकाचे यशस्वी संपादन, कोसबाड येथून प्रकाशित होणार्या ‘शिक्षण पत्रिका’ या मासिकाचे कार्यकारी संपादक. द इन्कलाब ह्या उर्दूतून निघणाऱ्या महाराष्ट्रातील एक क्रमांकाच्या दैनिकात मराठी गाणी उर्दूत करून देणारे सदर चालविले. पुण्यनगरी दैनिकात गेले चार वर्षे रोजच्या रोज सदर चालवीत आहे. पहिल्या वर्षी वाकया, दुसऱ्या वर्षी आपले शायर (महाराष्ट्रातील शायरांवर) आणि गेल्या वर्षी ‘हमखयाल’ हे सदर होते. यंदा ते ‘अजदवाजी ‘ म्हणजे सांसारिक गोष्टींवरचे उर्दू शेर देत आहेत.दर रविवारी शख्सियतें हे सदर लिहीत आहे. त्याचे १५० हून अधिक भाग प्रसिद्ध झाले आहेत. एका लेखकाने सतत चार वर्ष रोजच्या रोज सदर लिहिण्याच्या या विक्रमाची नोंद ‘ललित’ या मासिकाने घेतली आहे.
कार्यक्रम:-
‘गझलदीप’या त्यांच्या मराठी गझलांच्या स्वतंत्र कार्यक्रमाचे आतापर्यंत महाराष्ट्र व इतर राज्यांमध्ये किमान दीड ते दोन हजार प्रयोग झाले आहेत. अमरावती येथे १९८९ ला झालेल्या संमेलनापासून अखिल भारतीय संमेलनात त्यांचा सातत्याने निमंत्रित कवी म्हणून सहभाग आहे. दुबई येथे झालेल्या अखिल भारतीय साहित्य संमेलनात पुण्याहून फक्त त्यांनाच निमंत्रित केले होते.
शैक्षणिक अर्हता:- एम.ए.(प्रथम श्रेणी प्राप्त) सध्या ‘दुष्यंतकुमार आणि सुरेश भट यांचा तौलनिक अभ्यास‘ या विषयावर पीएचडी करीत आहेत.